عدنان صدیقی اور سلمان خان میں سے بہتر میزبان کون ہے؟ فیضان شیخ نے بتادیا
اداکار فیضان شیخ نے عدنان صدیقی اور سلمان خان کی میزبانی کے انداز کا موازنہ کرتے ہوئے واضح انداز میں اپنی رائے دی۔
حال ہی میں فیضان شیخ نے وکی خان کے پوڈکاسٹ میں شرکت کی، جہاں انہوں نے مختلف معاملات پر کھل کر گفتگو کی۔
ایک سوال کے جواب میں فیضان شیخ نے کہا کہ تھیٹر میں کام کرنے میں انہیں زیادہ مزا آتا ہے، حالانکہ وہاں معاوضہ کم ہوتا ہے لیکن اس کے باوجود تھیٹر میں کام کرکے انہیں زیادہ تسکین حاصل ہوتی ہے۔
انہوں نے یہ بھی کہا کہ جن اداکاروں کے پاس تھیٹر کا تجربہ ہوتا ہے، ان کے لیے ٹی وی پر کام کرنا آسان ہو جاتا ہے۔
پاکستانی ریئلٹی شو ’تماشا‘ کے حوالے سے ان کا کہنا تھا کہ اس شو کا حصہ بن کر انہیں بہت مزا آیا، اگرچہ یہ تجربہ مشکل تھا کیونکہ وہاں موبائل فون کے استعمال کی اجازت نہیں تھی، لیکن مجموعی طور پر یہ ایک مثبت تجربہ رہا۔
ان کا کہنا تھا کہ ’تماشا‘ شو پلانٹڈ نہیں ہوتا، بلکہ جو کچھ بھی ناظرین دیکھتے ہیں وہ حقیقی ہوتا ہے۔
فیضان شیخ نے واضح کیا کہ ’تماشا‘، ’بگ باس‘ کی کاپی نہیں ہے بلکہ اس کے پیچھے وہی طریقہ کار ہے جو ’بگ برادر‘ جیسے بین الاقوامی ریئلٹی شوز اپناتے ہیں۔
ان کے مطابق ’تماشا‘ نے باقاعدہ طور پر ’بگ برادر‘ سے حقوق حاصل کیے ہیں، جس طرح ’بگ باس‘ نے بھی کیے تھے۔
انہوں نے تماشا اور بگ باس کا موازنہ کرتے ہوئے کہا کہ ان کے خیال میں تماشا زیادہ بہتر ہے، کیونکہ اس نے صرف تین سیزنز میں ہی مقبولیت حاصل کرلی، جب کہ بگ باس کو اس سطح تک پہنچنے میں کئی سیزن لگے، اس لحاظ سے دیکھا جائے تو تماشا زیادہ کامیاب ہے۔
فیضان شیخ کے مطابق ان دونوں شوز کے درمیان سب سے بڑا فرق ثقافت کا ہے۔
ان کا کہنا تھا کہ بگ باس میں ہر چیز دکھائی جا سکتی ہے، جب کہ تماشا میں کچھ پابندیاں ہیں ان کے نزدیک یہ پابندیاں جائز ہیں کیونکہ ہر ملک کی اپنی ثقافت اور اقدار ہوتی ہیں۔
آخر میں انہوں نے عدنان صدیقی اور سلمان خان کے درمیان موازنہ کرتے ہوئے کہا کہ عدنان صدیقی بہت عمدہ انداز میں میزبانی کرتے ہیں، جب کہ سلمان خان ٹیلی پرامپٹر کے بغیر ایک جملہ بھی صحیح طریقے سے ادا نہیں کر سکتے۔
لائیو ٹی وی