جلیانوالہ باغ قتل عام پر بنی فلم ’کیسری ٹو‘ ریلیز، توجہ حاصل کرنے میں ناکام
بولی وڈ کھلاڑی اکشے کمار، آر مدھاون اور اننیا پانڈے جیسی کاسٹ پر مبنی بولی وڈ فلم ’کیسری ٹو‘ کو ریلیز کردیا گیا، تاہم فلم شائقین کی توجہ حاصل کرنے میں ناکام رہی۔
فلم کو جلیانوالہ باغ قتل عام کی برسی کے چند دن بعد 18 اپریل کو ریلیز کیا گیا تھا اور فلم نے 23 اپریل کے اختتام تک پانچ دن میں 38 کروڑ روپے کی کمائی کی تھی۔
’ٹائمز آف انڈیا‘ کے مطابق اچھی کہانی ہونے کے باوجود فلم شائقین کی توجہ حاصل کرنے میں ناکام رہی اور فلم کی 5 دن کی کمائی محض 38 کروڑ روپے رہی۔
خیال ظاہر کیا جا رہا ہے کہ فلم ایک ماہ کے اندر 100 کروڑ کلب میں شامل ہوگی، دوسری جانب فلم میں اننیا پانڈے کی کمزور اداکاری پر بھی شائقین کی جانب سے سوالات اٹھائے جا رہے ہیں۔
کیسری 2’ کی مرکزی کہانی جلیانوالہ باغ قتل عام کے بعد برطانوی حکومت کے خلاف وکیل سی سن کرن کی عدالتی جنگ پر مبنی ہے۔
فلم میں اکشے کمار وکیل سی سن کرن جب کہ رام مدھاون ان کے مخالف یعنی برطانوی حکومت کے وکیل کے طور پر دکھائے دیے ہیں۔
اداکارہ اننیا پانڈے بھی فلم میں ایک وکیل کے طور پر نظر آئیں گی جب کہ فلم میں متعدد بار جلیانوالہ باغ قتل عام کے مناظر دکھائے گئے ہیں۔
فلم کی ہدایات کرن سنگھ تیاگی نے دی ہیں جب کہ اسے کرن جوہر کی فلم پروڈکشن کمپنی نے پروڈیوس کیا ہے۔
فلم اکشے کمار کی 2019 کی مقبول فلم ’کیسری‘ کا سیکوئل ہے، پرانی فلم بھی حب الوطنی کی کہانی کے گرد گھومتی تھی۔
خیال رہے کہ جلیانوالہ باغ قتل عام 13 اپریل 1919 کو امرتسر میں ہوا تھا، جہاں برطانوی فوج نے پرامن احتجاج، جس میں زیادہ تر سکھ مرد و خواتین شامل تھے، پر گولیاں برسا کر ان کا قتل عام کیا۔ اس دن 15 ہزار سے زائد افراد بیساکھی کا تہوار منانے کے لیے عوامی پارک میں جمع ہوئے تھے، جہاں سے باہر جانے کا ایک ہی تنگ راستہ تھا۔
وہ لوگ ہتک آمیز رولیٹ ایکٹ کے خلاف احتجاج کے لیے اکٹھا ہوئے تھے، اور جنرل ریجینالڈ ڈائر انہیں خاموش کرنے نکلے تھے۔ بغیر کسی وارننگ کے اچانک بندقوں سے 1650 گولیاں چلائی گئیں۔ اس واقعے میں 500 سے 600 کے درمیان لوگوں کی موت ہوئی، کچھ اندازوں کے مطابق اموات کی تعداد ایک ہزار تھی جبکہ زخمیوں کی تعداد اس سے 3 گنا زیادہ تھی۔
لائیو ٹی وی